ᐃᓂᓕᒃ ᑐᓄᕕᐊᓂ ᓯᒡᔭᖓᓂ ᓴᓂᑭᓗᐊᑉ ᕿᑭᖅᑕᖏᓐᓂ, ᓴᓂᑭᓗᐊᖅ ᒫᓐᓇᐅᔪᖅ ᓂᒡᒋᐊᓃᓐᓂᖅᐹᖑᕗᖅ ᓄᓇᓕᒋᔭᐅᔪᓂ ᓄᓇᕗᒻᒥ. ᕼᒻᓚᖓ ᐱᓴᐃᖅᑕᐅᓂᒡᑯᕗᖅ 1974-ᒥ, ᑭᓯᐊᓂ ᓄᓇᖃᖃᑦᑕᖅᓯᒪᕗᑦ ᕿᑭᖅᑕᓂ ᑲᖏᖅᓱᐊᓘᑉ ᐃᓗᐊᓂ ᐊᑯᓕᐊᓗᒃ ᐊᕐᕌᒍᒐᓵᓗᖕᓂ. ᐊᑎᖓ ᓄᓇᓕᐅᑉ ᐅᓂᒃᑳᖅᑐᐊᒥ ᐃᓄᖕᒧᑦ ᐱᔭᐅᓯᒪᕗᖅ ᑭᖑᓂᑦᑎᓐᓂ. ᑕᑯᒃᓴᐅᓂᖓ ᓴᙱᔪᒥᑦ ᑐᑭᓯᒍᑎᖓ ᓇᓂᔭᐅᔪᓐᓇᖅᐳᖅ ᐱᑕᖃᓚᐅᕐᓂᖓᓄᑦ ᑐᓃᑦ ᐃᓕᖅᑯᓯᕆᕙᓚᐅᖅᑕᖏᓐᓂᑦ ᓄᓇᓕᐅᔪᓂᑦ ᐃᓕᓴᕆᔭᐅᔪᓐᓇᖅᖢᑎᒃ ᑕᐃᒪᙶᓗᒃ 500BC-ᒥᑦ ᐊᒻᒪᓗ ᐱᑕᖃᐃᓐᓇᑦᖢᑎᒃ 1000 AD-ᒧᑦ ᑎᑭᖦᖢᒍ. ᑭᖑᓂᐊᒍᑦ, ᐃᓄᐃᑦ ᓯᕗᕚᖏᑦ ᓴᖅᑭᔮᕐᓂᖅᓴᐅᓕᓚᐅᖅᐳᑦ 1200 ᐊᒻᒪᓗ 1500 AD. ᑕᐃᒫᒃ, ᓄᓇᖃᖅᑐᐃᑦ ᕿᑭᖅᑕᒥ ᐊᑐᓕᒪᕗᑦ ᐊᒃᓱᕈᕐᓇᕐᓂᖓᓂ ᐊᔾᔨᐅᖏᑦᑐᒥ ᐊᕙᑎᓕᖕᒥᑦ. 1800-ᖏᓐᓂ, ᐊᑕᐅᓯᖅ ᐊᒃᓱᕈᕐᓇᕐᓂᐅᓚᐅᖅᑐᖅ ᐊᓯᐅᑎᓪᓗᒋᑦ ᑐᒃᑐᐃᑦ ᑕᒫᓃᑉᐸᓚᐅᖅᑐᑦ. ᐊᓯᐊᒍᑦ ᐅᖅᑰᔾᔪᑎᐅᓚᐅᖅᑐᖅ ᐊᓐᓄᕌᓄᑦ ᓇᓂᔭᐅᓚᐅᖅᐳᖅ ᖁᓂᒍᓂᑦ ᒥᑎᕐᓂᑦ, ᑎᖕᒥᐊᖅ ᐃᕙᓲᖅ ᕿᑭᖅᑕᒥ. ᖁᓂᒍᕐᒥ ᐊᑐᕐᓂᖅ ᐊᓚᒃᑲᐅᑎᕗᖅ ᐊᔾᔨᐅᙱᑦᑐᒥ ᖃᓄᐃᓕᐅᕐᓂᕆᕙᓚᐅᖅᑕᖏᓐᓂᑦ ᓄᓇᒋᔭᐅᔪᒥᑦ ᐅᑭᐅᖅᑕᖅᑐᒥ.
ᐊᖏᔪᐊᓗᒃ ᕿᑭᖅᑕᐃᑦ, ᒫᓐᓇᐅᔪᖅ ᑕᐃᔭᐅᓲᖅ ᓴᓂᑭᓗᐊᑉ ᕿᑭᖅᑕᖏᓐᓂ, ᖃᐅᔨᒋᐅᖅᑕᐅᓚᐅᖅᐳᖅ ᓯᓚᑎᑦᑎᓐᓂ ᖃᐅᔨᓴᖅᑎᐅᔪᓂᑦ 1610-ᒥ ᕼᐊᓄᕆ ᕼᑦᓴᓐ ᑎᑎᕋᖅᑐᕕᓂᐅᑎᓪᓗᒍ ᑕᑯᓂᖓᓂᖓᓂ. ᑭᓯᐊᓂᓕ, 1840-ᖑᓕᖅᑎᓪᓗᒍ ᐃᖅᑲᓇᐃᔭᖅᑎᐅᔪᖅ ᓂᐅᕕᖅᑎᒃᑯᓐᓂ, ᑖᒥᔅ ᐅᐃᒑᓐᑦ, ᖃᐅᔨᓴᕐᓂᖃᖅᑎᑦᑎᓪᓗᓂ ᕿᑭᖅᑕᒧᑦ ᑲᖏᖅᓱᕐᔪᐊᒥ (ᓯᓴᓯᐱ). ᑭᖑᓂᐊᒍᑦ 1915-ᒥ, ᑕᕐᕆᔭᓕᐅᖅᑎ ᐊᒻᒪᓗ ᐃᓕᖅᑯᓯᓕᕆᔨ, ᕌᐳᑦ ᐸᓛᕈᑎ ᓯᕗᓪᓕᖅᐹᖑᓪᓗᓂ ᖃᓪᓗᓈᖑᓪᓗᓂ (ᑕᐃᑲᓂᕐᒥᐅᑕᐅᙱᑦᑐᖅ) ᐅᑭᐅᕐᒥ ᑕᖕᒫᓚᐅᖅᐳᖅ. 1920-ᖏᓐᓂ, ᕿᑭᖅᑕᐃᑦ ᕿᒥᕐᕈᐊᖅᑕᐅᓚᐅᖅᐳᑦ ᐋᖅᑭᒃᓱᐃᔨᐅᔪᒥᑦ ᑎᑎᕋᐅᔭᖅᑎᒥᑦ ᐃᖅᑲᓇᐃᔭᖅᑐᒥ ᑲᓇᑕᐅᑉ ᐱᓕᕆᕝᕕᐅᔪᒥᑦ ᐃᑎᓪᓕᓯᐅᖅᑎᓂᑦ ᐊᒻᒪᓗ,ᐊᑯᓂᐅᙱᑦᑐᖅ, ᓂᐅᕕᖅᑎᒃᑯᑦ ᒪᑐᐃᖅᓯᓚᐅᖅᐳᑦ ᑕᐅᖅᓰᕕᐅᔪᒥᑦ, ᓱᒃᑲᐃᒡᓕᒋᐊᕈᑎᖃᖅᖢᑎᒃ, ᐱᓕᕆᓂᖃᖅᖢᑎᓯᒃ 1950-ᖏᓐᓄᑦ. ᑕᐃᒪᙵᑦ ᕼᒻᓚᖑᔪᖅ ᓴᓂᑭᓗᐊᕐᒥ ᐱᓇᐃᖅᓯᒪᓕᕐᒪᑦ ᒪᕐᕉᖕᓂᑦ ᓄᓇᓕᖃᓚᐅᖅᐳᑦ - ᑐᓄᕕᐊᓂ ᐊᒻᒪᓗ ᓂᒡᒋᐊᓂ ᐃᓱᖏᓐᓂ ᕿᑭᖅᑕᐅᑉ. ᓂᐅᕕᑦᑎᒃᑯᑦ ᑐᓄᕕᐊᓃᖦᖢᑎᒃ ᓄᓇᓕᖕᓃᓕᓚᐅᖅᐳᑦ ᐊᒻᒪᓗ ᐃᓕᓐᓂᐊᕐᕕᒥᑦ ᐊᒻᒪᓗ ᐊᖏᕐᕋᕆᔭᐅᔪᒃᓴᓂᑦ ᓴᓇᓕᓚᐅᖅᐳᑦ ᓂᒡᒋᐊᓂ. ᐃᓱᒪᓇᓱᐊᕐᓂᕐᒧᑦ ᑮᓇᐅᔭᓂ ᑲᔪᓯᔾᔪᑎᒃᓴᐅᓇᔭᖅᑐᓂ, ᒐᕙᒪᒃᑯᑦ ᑲᓇᑕᒥ ᐋᖅᑭᒃᓯᓕᓚᐅᖅᐳᑦ ᕼᒻᓚᐅᔪᒥ ᑐᓄᕕᐊᓂᑦ ᓄᓇᓕᐅᔪᒥᑦ - ᒫᓐᓇᐅᔪᖅ ᓴᓂᑭᓗᐊᖑᕗᖅ. 1999-ᖑᖅᑎᓪᓗᒍ ᑭᓯᐊᓂ, ᕼᒻᓚᖓᑦ ᐃᓚᒋᔭᐅᓚᐅᖅᐳᖅ ᓄᓇᑦᓯᐊᕐᒥ, ᑭᓯᐊᓂ ᐊᕐᕌᒍᒐᓴᓂ ᓄᓇᑖᕋᓱᐊᕐᓂᕐᒧᑦ ᐊᖏᖃᑎᒌᒐᓱᐊᕐᓂᕐᒧᑦ ᐋᔩᖃᑎᒌᖕᓂᕐᒧᑦ ᐊᒻᒪᓗ ᒐᕙᒪᓕᕆᓂᕐᒧ ᐊᖏᖃᑎᒌᒍᑎᒥᑦ ᓴᖅᑭᑕᐅᔪᖃᕐᒪᑦ 1992-ᒥ, ᓄᓇᕗᑦ ᐊᒻᒪᓗ ᓄᓇᑦᓯᐊᖅ ᐊᕕᒃᑕᐅᓚᐅᖅᐳᑦ ᓴᖅᑭᑎᑦᑎᔪᓐᓇᖁᓪᓗᒋᑦ ᓄᑖᖑᔪᒥᑦ ᓄᓇᕗᒻᒥ. ᓴᓂᑭᓗᐊᖅ ᐃᓚᒋᔭᐅᓕᖅᐳᖅ ᕿᑭᖅᑖᓗᖕᒥᑦ ᓄᑖᖑᔫᑉ ᓄᓇᕗᒻᒥ.